Amezruy-is

Adlis amenzu i d-yeffɣen s Teqbaylit d win yura Adolphe Hanoteau ɣef tuɣac n Ǧerǧer deg useggas n 1867, deffir-is d win Bensdira Timsirin n Teqbaylit i d-yeffɣen deg useggas n 1887. Umbɛed d Auguste Mouliéras yuran sin n yidlisen ɣef tmucuha n Tmurt n Yiqbayeliyen gar n yiseggasen n 1891, 1893 d 1895, akked Bulifa i yuran adlis ɣef yisefra n Si Muḥend u Mḥend deg useggas n 1904.

Imir-nni, uran Yifṛansisen kra n yidlisen ɣef tmucuha d yisefra n Yiqbayliyen. Ungal amenzu yettwarun s Teqbaylit d win yura Belɛid At Ɛli deg yiseggasen 1940.

Adlis i as-yefkan ilugan iṛessan n tjeṛṛumt i Teqbaylit d win yura Mulud n At Mɛemmeṛ. Kamal U Zerrad netta yerna-d ɣef umahil n Dda Lmulud i wakken ad d-iṛessi ugar ilugan n tjeṛṛumt n tutlayt-a.

Iseggasen-a ineggura ffɣen-d azal n 400 en yidlisen s Teqbaylit, gar ammuden n yisefra, tullisin akked ungalen d isegzawalen.

Taqbaylit asmi i d-kecmen Yifṛansisen ar tmura Timaziɣin n Tefriqt Ugafa tella tettwameslay deg yiwet n temnaḍt meqqṛen, azal n snat n tikkal, tamnaḍt n Yizwawen (Leqbayel) n wass-a.

Seg tudrin i d-yezzin i Mila, ar tid n yidurar n Lḥuḍna, idurar n Ṣṭif, idurar n Jijel, Msila d wezray ar tmurt n Leqbayel n wass-a, At Wartilan, At Yeɛla, akked iderma n temnaḍt n Bgayet, n Tubiret akked wid n Tizi Wezzu d Bumerdas.